Si të dekoroni kopshtin e shtëpisë tuaj? 

Nuk është e thënë të jesh nje adhurues i madh i natyrës që të kuptosh rëndësinë që ajo ka që nga pyjet e fushat me gjelbërim deri te një kopsht modest në oborrin e një shtëpie. Përtej pastrimit të ajrit dhe furnizimit me oksigjen një kopsht në shtëpi të kënaq sytë dhe të fal një qetësi të pashpjegueshme. Nëse jeni sado pak kreativ ju mund të krijoni një kopsht edhe në hapësira të vogla në shtëpitë tuaja s:i në ballkon, verandë e akoma më mirë në oborrin e shtëpisë tuaj. Do t’ju duhet shumë pak punë dhe angazhim për të patur një vend të veçantë ku të pini kafen e mëngjesit dhe të relaksoheni, por për më shumë do të flasim në vazhdim.

Sot do t’ju prezantojmë me idetë dhe këshillat më të mira për të krijuar një kopsht përrallor ose për të përsosur atë që keni aktualisht. 

Mbuloni portën e hekurit me gjethe 

Edhe në hapësirat më të vogla, shtimi i gjetheve kacavjerrese në dyer dhe mure apo gardhe do të shtonte sensin e privatësisë dhe do ta bënte ambjentin të dukej më mistik. Ju mund të mbillni disa bimë kacavjerrëse në tokën pranë portës se hekurit dhe mureve ose mund të vini vazo lulesh mbi mure dhe t’i lini bimët të zbresin nëpër sipërfaqen e tyre. Nëse do të keni një gardh zbukurues do të jetë akoma më e lehtë për ti shtuar bimët kacavjerrëse sepse ato kapen lehtësisht në gardh. 

Krijoni një baçe për të mbjella

Nëse kopshti juaj ka hapësirë do të ishtë shumë e lehtë për ju të krijonit një baçe ë vogël ku të mbillni perime. Në këtë mënyrë do të keni gjithmonë perime të freskëta në shtëpi pa kimikate të shtuara. Ju mund të kultivoni në kopshtin tuaj gjithë perimet tuaja të preferuara si: domate,karrota, sallatë, qepë e shumë të tjera. Ndiqni këto këshilla për të mësuar si të krijoni një kopsht në shtëpinë tuaj.

Mos u frikësoni sepse një baçe e vogël është shumë e lehtë për tu menaxhuar dhe mirëmbajtur dhe nuk do t’ju duhen dije të avancuara për të patur sukses. Për më tepër procesi kultivimit të tyre është gjithashtu shumë argëtues dhe do ta shijoni këtë kohë cilësore të kaluar me familjen tuaj, pasi të jeni të sigurt që dhe fëmijët do të jenë kurioz për t’ju bashkuar. 

Krijoni një koleksion vazosh me lule

Krijoni një koleksion duke mbledhur lulet tuaja të preferura dhe mos kini frikë të provoni të kultivoni gjithashtu lule të veçanta. Ju sugjerojmë mos ti lini në tokë vazot me lule sepse do të humbni midis bimëve të tjera të kopshtit, ndaj konsideroni ti vini diku lart ku i kap dhe syri juaj. Mund të zgjidhni t’i poziciononi mbi një tavolinë druri, paleta të vjetër ose komodina të përdorura në mënyrë që të jenë sa më të dukshme dhe të mahnisni çdo vizitor të kopshtit tuaj. Për tu siguruar që të mos bien e dëmtohen mund ti siguroni me një gardh të vogel të thurur me tela. Nëse keni tela të ndryshkur në shtëpi mos ngurroni ti përdorni pasi do ti shtojnë akoma më shumë prekjen vintage. 

Vendosni nje tavoline që shkon me gjithë ambjentin 

Pa dyshim që stili dhe ngjyrat e tavolinave dhe karrikeve që zgjidhni do të kenë një impakt shumë të madh në gjithë dekorin e hapësirës së kopshtit tuaj. Gjithashtu duhet të siguroheni që ato të jenë në të njejtën linjë me dekorin e pjesës tjetër të kopshtit. Mund të zgjidhni tavolina plastike ose tavolina hekuri por duhet të kini kujdes kur zgjidhni materialin sepse dhe ky i fundit është një përbërës kryesor që bie shumë në sy kur flasim për mobilje. Nëse  zgjidhni ta vendosni tavolinën tuaj në një pjesë toke të shtuar me gurë do ti jepte një pamje më të rafinuar kopshtit tuaj. Nga ana tjetër, vendosur mbi një pjesë toke të pashtuar apo të mbjelle me bar do të shtonte lidhjen me natyrën.

Ndriçoni rrugën 

Natyra duket akoma më romantike dhe misterioze kur bie muzgu, kur ndriçon vetëm hëna dhe disa llampadarë apo fenerë të vendosur nëpër pemë. Çojeni ndriçimin e kopshtit tuaj një hap më para duke përfshirë këto ndriçues kaq të vegjël por shumë domethënës në kopshtin tuaj. Zgjidhni disa ndriçues të jashtëm dhe varini ato në degët e pemëve për të shtuar shkëlqim dhe mister. Do të ishte e mahnitshme të kombinonit këto fenerë të varur në pemë me llapadarë të fiksuar prej hekuri për të ndriçuar rrugicat e kopshit në një shëtitje të këndshme pasdite. 

Shtoni pak elegancë me një shatërvan

Asgjë nuk e bën një kopsht më elegant sa një shatërvan dramatik. Përvec kësaj është qetësuese, pothuajse sa një meditim, të dëgjosh zhurmën e ujit të rrjedh nga një shatërvan kur ben një shëtitje në kopësht. Zhurma e një shatërvani, së bashku me fërfërimat në gjethet e japin një ndjesi çlodhjeje dhe frymëzimi. 

Blini kafaze zogjsh 

Nëse ju pëlqen të zgjoheni nga cicërimat e zogjve në mëngjes mos ngurronii të merini disa kanarina ose kafaze zogjsh për tu zgjjuar çdo ditë sa më pranë natyrës. Mund ti vendosni këto shtëpi zogjsh në çdo cep të kopshtit tuaj, por kini parasysh që të jenë lehtësisht të aksesueshëm sepse do të kujdeseni çdo ditë për kanarinat tuaja. 

Edhe nëse nuk keni një kopsht të madh, mund ti mbani ato në verandë apo në ballkonin e shtëpisë tuaj. Nuk do të mërziteni kurrë duke i dëgjuar sepse cicërimat e kanarinave do ti japin një melodi të vecantë kopshtit dhe jetës tuaj.

Pse ju duhet një kopsht ?

Së pari një kopsht do e bënte pamjen e shëpisë tuaj më estetike dhe do ti shtonte  ngjyrë asaj. Natyra simbolizon vetë jetën ndaj nuk ka më mirë se një kopsht për ti dhënë jetë shtëpisë suaj. 

Pa dyshim që një kopsht do të shtonte energjinë pozitive dhe do të krijonte një hapësirë shumë të mirë relaksi në shtëpinë tuaj. Kujt nuk do ti pëlqente një shëtitje apo darkë në kopshtin e shtëpisë pas një dite të lodhshme pune? 

Gjithë atmosfera qe krijon një kopsht me elemëntët e tij është tejet frymezuese dhe nuk ka menyrë më të mirë për të nisur një ditë pranvere me diell.